E schlaue Buur wot e paar Fränggli spare
und ladet zwöi vo sine Rindli uf e Charre
Fahrt schnuerstraggs uf Laufe is Tierspital
däm Viech isch dä Bsuech überhaupt nit egal
Chuum het dr Buur Tür vom Ahänger offe
Isch eis vo de Tierli dr Bärg ufegloffe
Es spurtet dr ganz Allmändwäg dure
gheyt i dr Kurve fascht uf d Schnurre
Bim Schuelhus s Loch ab, denn im Stedtli ei Gschrey
Alli Lüt riefe entsetzt – wo isch d Polizei?
Dr Max, wo s gwohnt isch, Verchehrssünder z jage
au dä wot däm Rindli jetz chräftig a Chrage
Er stellt sich däm Unghüür muetig i Wäg
Und stellt si Ranze – me gseht, er isch zwäg
Diräggt über d Brugg, a d Bahnhofstross
Im Birscenter isch gli scho dr Teufel los
S Rind, das goht jetz uf Shopping-Tour
Hinge noche rennt immer no dr ufgregti Buur
Ei Denner-Bsuecher will sich schnäll verstegge
Und fliegt denn ganz erstuunt in e Egge
"Was isch denn das für e grosse Hung
Schloht denn jetz scho mini letschti Stung?
I ha dänggt, es sig e Köter, so e bissigs Tier
Drbi isch s jo numme e harmlose junge Stier
Dä segglet jetz wieder s Stedtli durab
Und haltet die ganzi Meuti uf Trab
Wot bim Coiffeur e neui Frisur lo mache
D Lüt finge dä tierisch Schönheitswahn nit ganz bache
Für was brucht das Tier denn e neui Frisur
Frogt sich schliesslich au dr gyzigi Buur
Mir Millennium-Waggis, mir wüsses genau
Das Rind isch nit doof, nei, es isch sehr schlau
Es muess doch schön si für e Laufner-Lauf
Und nimmt drfür alli Strapaze i Chauf
Mir meine, s OK steckt mit em Buur unger einer Deggi:
Das Tier teschtet nämli scho die neui Laufner-Lauf-Streggi