D'Stadtröt im Grössewahn
In Laufe do kennsch du no jede
Im Stedtli chasch mit vilne Lüt rede
Euse Ort isch o hüt no e Bsüechli wärt
Nit numme wäg em attraktive Zischtigs-Märt
Sit churzem aber, mir finges nid dr Hit
Macht Laufe e unagnähmi Entwicklig mit
Eusi Stadtröt si we immer voller Elan
Oder nenne mirs doch besser Grössewahn
Laufe dörf sich sit neuschtem Stadt nenne
Millione Europäer wärde euse Ort so gli kenne
Das goht jo no alles, das stört eus nit
Laufe e Stadt – kei schlächte Schritt
Gwüssi Plän vo eusne Stadtröt lehne mir aber ab
Im Buecher si Idee finge mir eifach nur schlapp
E High-Tech-Schwümmbad, das isch doch e Seich
Bi söttige unsinnige Idee wärde o vil Stürzahler bleich
E Wasserrütschbahn und e Heizig fürs Becki
Bi so Idee gö mir doch alli a Decki
Nur eine freut's, dr Bruno Saner
Mir kenne ihn alli als grosse Planer
Dr Schwümm-Wettbewärb wird jetz no attraktiver
Schwümme im warme Wasser, was isch no naiver?
Wär brucht so Sache, die Frog stelle sich d’Lüt
I eusne Auge bringt das genau nüt
Unnötigi Gäldverschwändig isch euses Stichwort
Mir bruche s’Gäld lieber amene angere Ort
Als Stadt bruche mir no vili Sache
Die Badi-Irrichtige si eifach zum Lache
Wenn das so witer goht, chönne mir eus freue
I tue d’Entwicklig jetz scho bereue
E Flughafe z’Laufe, zuedem e Kino-Komplex
Do wird i Zuekunft niemer me perplex
E Zolli im Griene, e grossi Disco im Stedtli
Söttigi Sache hole d’Lüt gli us em Bettli
Dr Stadtrot im Grössewahn, er isch nit z’stoppe
Die nechschte Projekt cha o Basel nit toppe
Laufe mutiert halt langsam zur Stadt
Wie dir gseht, finge mir das gar nit glatt
